拖車!

本來諗住搭呀爸架前七順風車, 點知my god, 打電話黎話架車冇電跪左係牛頭角, 結果順風車搭唔成, 仲要我搭地鐵去牛頭角, 買2支蒸餾水去救亡!

去到見到架車停左係路邊, 就同呀爸夾手夾腳開左車頭入d 水去電池箱, 入完再撻匙, 緊係唔著啦!
唯有截經過既的士問有冇過江龍啦, 點知架架都冇, 問左10架到之後卒之都截到架有! 點知佢條過江龍又鬼咁短, 2架車差d 撞埋先岩岩夠位! 好啦, 過到電撻得著啦, 先冇左1舊水, 諗住渣去車房門口求救啦, 點知行唔夠3分鐘又冇電又跪!

唉, 最後唯有叫拖車啦, 打左幾個電話先搵到拖車係附近, 話半個鐘到, 點知一等又成50分鐘, 黎到個師父好鬼快手上好拖架, 咁就緊係拖去車房門口啦, 咁又冇左$250!!

最後同呀爸打的返屋企, 又冇左$30, 最初我只係想搭順風車慳番幾蚊...最後冇左4舊水兼2:30am 先返到屋企, 真係經典!